« البهامة »

السلام عليكم. بطيت عليكم شوية يا جماعة, ظروف الخدمة هي الي منعتني عليكم.
ليوم نحب نحكيلكم على ميزة اخرى من مميزات الشعب التونسي وهي البهامة.

بهامة الّتونسي تتجلى في برشا حاجات انجمو انراوها كل يوم, كمثال على هذا السيّد الي يتشعبط في حيط دارو يدخل باس يسرق رسابتور, موش بهامة الي هو يرسكي باش يتشحط بدراه قدّاش من عام حبس على عشرين الف؟ يشوفو زملائهم المجرمين الاماريكان و الاروبيين كيفاش و اش يسرقو, بانكات, صاغيّة, الخ. و احنا تلقا زبور امه ناتر برتابل لطفلة و يجري و عادة يتشد و ياكل ما ياكل الطبل و يزيد يدكّوه في الحبس. توّة يوليش الحاكم يعمل في دروس للقطعيّة و السرّاق باش ينهضلهم بالمستوى الفكري متاعهم؟؟؟

بكل جدية توّا, صحيح الفقر و البطالة تلز برشة باش ينحرفو, و لوكان لقاو خدمة و شهرية باهية ما يعملوش هكاكة, اما لوكان جاو يعرفو كيفاش يخممو راهم بالكشي خير, و تنجم تكون بهامتهم هي الي قضاة عليهم.

علاش طبتهم خير من طبتنا, والاساتذة تاعهم خير من اساتذتنا و حتى السراق متاعهم خير من السراق متاعنا؟؟؟؟ بكل بساطة خاطر في تونس عندنا بزايد بهامة.

نتلاقاو نهار الثلاثاء.

"العنف"

السلام عليكم,

اليوم نحب نحكيلكم على ميزة اخرى من مميزات الشعب التونسي وهي "العنف". التّونسي, وعلي عكس ما يتصوروا برشا عباد من انه انسان مسالم, اما هو للاسف عنيف و مجودر ياسر ياسر.استعمال العنف سواء كان جسدي ولا لفظي يكون عادة باش يمشّي الواحد رايو وقناعاتو على غيرو. بلغة اخرى قانون الغاب, والقوي يغلب الضعيف. وبما انه التونسي حجّته ديما ضعيفة يدوّرها يا صياح و عياط و سبّان و كلام زايد يا تكسير خلايق.

الواحد ولّى يحشم يخرج للشارع مع بوه ولّى امو خاطر يعرف الي الكلام الزايد باش يبدا يخبط. يولي الواحد يقول اش لزني نقعد انا و الشايب للحشمة و تطييح القدر؟ على خاطر يا ويحو يسكت ويطيح قدرو خاطر ما قدروش بوه ولا امو, و يا ويحو يتكلم و وقتها مع قدرو يزيد يطيح جداقو. تقول انتي علاش العنف؟ حسب رايي ثما زوز اسباب:

السبب الاوّل هو التربية. كناّ شفنا في البوست السابق احدى تقنيّات التربية البيداغوجيّة التونسيّة و الطريقة الي تكمّلها هي العنف, شي طبيعي الي كيف انربيو ولادنا بالكف و المشطة و السب و تطييح القدر باش يمشي في بالهم الي هاذيكة الطريقة البيداغوجية المثلي لتبليغ الافكار, وزيد فوق هذا باش يطلعوا ما عندهمش ثقة في رواحهم و نسبة منهم باش يحاولوا يغطّيو الخوف متاعهم بالعنف و اتولي الحكاية مسلسل متواصل و كل واحد يحاول يستقوا علي اضعف منّو. شوفو القورّة كيفاش يربّيو ولادهم بالكلام و الاقناع و التفسير و النتيجة يطلعو خير من ولادنا. زعمة صغارهم عباد و يفهمو بالكلمة و صغارنا هوايش ما يفهمو كان بالصطاكة؟ ما نتصوّرش.

السبب الثاني هو غياب الحوار على جميع المستويات ( السياسة, المدرسة...) العنف هو وسيلة فرض الهيبة و السلطة و النّفوذ في هال الميادين وهذا ما يزيد يغرس في امخاخ الشعب ثقافة العنف.

توّا نخلّيكم و نستنّا تعليقاتكم و تجاربكم في هال الدومان. اما قبل نحب نحكيلكم لقطة تحزّن شفتها قدّامي, راجل في القهوة جاه ولدو الصغير يعمل 5 ولا 6 سنين يبكي, يشكي من صاحبو نديدو يلعبو مع بعضهم تعاركو ياخي ضربو. اش كان رد فعل البو؟ كان رد فعل حضاري و كلّو حنان و عبر و مواعض الى ولدو, يقدّم و يوخّر ويلفّو بزوز كفوف و يزيد يسبّو و يقلّو "ماكش راجل, تبكي كيف ال****, ماو اضربو"

شنيّة تاثير هذا على نفسيّة الطفل؟؟ شي ياسّف

"قلّة التربية"

في هال بوست نحب نحكي عالى حاجة موجودة برشا عند التوانسة و هي "قلّة التربية".

قلّة التربية تنجّم تلاحظها في اصغر الحاجات, كيفاش يشدّ التونسي الصف في البوسطة, كيفاش يحب يتسربى هو الأوّل في الكوشة ولّى في حانوت العطّار, كيفاش القويّ يدز الضعيف باش يطلع قبلو في الترينو و يزيد يدز و يعفّس الهابطين ثمّاشي ما يدبّر بليّصة... و هلمّ جرّا. الأمثلة برشا و يمكن تعرفوها أكثر منّي. أمّا الأحلى و الأبهى هو كيف تقترن قلّة التربية مع البهامة حاشاكم.

مثال على هذا, البارح قاعد أنا و واحد صحيّبي في مقهى سياحي او ما يعبّر عنه بالعربيّة ب"الصالون دو تاي" في جهة قرطاج, قلنا نبعدو شويّة على وجوه اللوح و الحفلّش, ياخي هي هي لقيناهم. قتلكم عاد احنا قاعدين نهرّو عالى الخدمة و مشاكلها تتعدى طفلة تبارك الله اش يخلق, حليلتها, وأكثر حاجة تميّزها صدرها الكبير. و رغم صغر سنّها فهي واعية بالهبة الي عندها و فرحانة بيها و تحب تتقاسم شعور الفرح متاعها مع الناس, شاحطه روحها في بودي و شطر كرشها عريانه. تعدّاو زوز حفلّش من قبيلة الهوكش ,حاشى خليقة ربي, خزرّلها واحد منهم, و امبعد ما حركتلو برشى مشاعر قدّم و وخّر و قاللها "أعطيني شويّه حليب يا بقرة"؟؟؟

حقيقة افحمني بقوته في التبزنيس و تطيح البنات. هي بالطبيعة عطاتو كلمتين في العظم وامشات و هو قعد يتنوفخ قدّام صاحبو بالبطولة الفرشيشيّة متاعو. تّوا لا يزّي التقوعير و قلة التربية و زيد عليهم البهامة و التصتيكة البقري ما عنها وين توصلو كان تجيبلو تطيح االقدر من جهة البنيّة و سبان الراطسة متاعو من جهة المتفرجين على العنتريّات متاعو.
اش يحب يقول هال الجربوع بالتصرّف متاعو غير انّو يورّي بهامتو و قلّة تربيتو؟ الله اعلم باشنوّة قالو مخّو وقتها هذا كان عندو مخ من اصلو, نتصوّرنفسيّة معقدة كيما نفسيّة وخينا يلزمها فرود بيدو باش يحلّلها و يا ذنوبي كان يفهم حاجة.
المثال هذا نشوفوه برشى في المجتمع متاعنا لانه للاسف الشديد نسبة كبيرة من المجتمع متاعنا موش متربّي . والّي يزيد ينرفز و يحرق الدم هو انه برشة والدين يحاولوا على قدر المستطاع باش يطلّعوا ولادهم قلال تربية, قال شنوّة باش ينجّمو يعدّيو روسهم في الدّنيا, تلقاهم عاد مالصغرة و هومى شادين هاكل لصغير في سب عمي, ابزق على خالي... والنتيجة هي شعب متخلّف و مازال باش يقعد متخلّف.

نستنّا تعليقاتكم على التونسي و تربيتو ونتلاقاو بعد نهارين في هدرة اخرى.

المقدمة

السلام عليكم

_______

خمٌمت برشا قبل ما نعمل هال البلوغ. برشا حاجات نراوها كل يوم معوجة وحد ما يعلق عليها, كي نقول حد نقصد الصحافة التونسيٌة و مختلف فضائياتنا الي تجيب النوم اكثر من اقوى سومنيفار. قت عاد وبما انٌو السنا عام الحوار:}, يلزمنا نحكيو و انفرغو قلوبا حتى لوكان ما يسمعنا حتٌى واحد مالمسؤولين الكبار في البلاد, يمكن يجي نهار و يوليو يسمعونا و ياخذو بكلامنا.المهم كل ما نخرج للشارع, كل ما نحل تلفزتنا, لازم انلاحظ برشا عوج, وهال العوج و النتائج متاعو وشنوّة الحل هو الشي الي باش نحكيلكم عليه